Litt historie:
Gravrøysar på heile Ljoneshalvøya vitnar om at her har folk vore i fleire tusen år. Det er mange slike røyser langs kystlinja. Dette fortel om velmakt her for 3000 år sidan.

På 1200-talet budde Torgrim av Ljones her (Noregs Kongesagaer). Han var sysselmann i Hardanger. Såleis var han ein av birkebeinarhøvdingane som var i stadig kamp mot Baglarane.

Under slaget ved Rott utanfor Stavanger (1202), var han ein av skipsstyrarane. Då vart Baglarane jaga ut av landet nokre år. Dei påfølgande åra var han kongens mann i Bjørgvin og var med han i Viken. I denne tida stelde lensmannen Erling med sysla. Dette er den første omtala lensmannen i Norge. Han var drepen av Baglarane i 1205 etter at dei kom til Hardanger via Eidfjord.

Den 25.mars i 1206 gifte han seg med kongssystera Sigrid Bårdsdotter på Rein, i Nidaros. Kongen og dei gjævaste birkebeinarhøvdingane var samla i bryllaup og medan dei sov ut rusen kom Baglarane over dei og drap mange. Han la seg blant dei drepne og berga livet, medan kong Inge symde over Nidelva. Torgrim drap høvdingen Jon Usle og som hevn vart han sjølv drepen hausten 1206 medan han var i Bjørgvin. Sigrid gifte seg oppatt med Jon på Austråt.